De Meu é un bálsamo, unha fábula bailada, un espectáculo para gozar cos sentidos e co cerebro. Unha serie de obxectos van entrando en escena nos sucesivos actos para lembrarnos en que mercadoría se nos quere converter desde a educación ou desde as industrias de moda e o consumo: zapatos de tacón, veos de casamento, traxes axustados traballan como emblemas de beleza ou de castidade. Cando eses obxectos van caendo, entre os movementos áxiles das pernas das bailarinas, deixaron de ser símbolos de opresión. Como nos seus espectáculos anteriores (Quid est mulier? e O que viven as rosas) a compañía de Dolores Mayán atrévese a bailar contando a historia das mulleres, nun ton disidente ben distinto da versión oficial. As mulleres de BStudiodanza outra vez constrúen no escenario un espazo para a muller. Un espazo para que todas digamos: “isto é de meu”.Teresa Moure
Leer más…
Comentarios